ភ្នំពេញ៖ នៅថ្ងៃទី២៤ ខែធ្នូ ឆ្នាំ២០២៤ មន្ត្រីអាជ្ញាធរជាតិដោះស្រាយវិវាទក្រៅតុលាការ រួមមានលោក ជ្រិន បូឡី លោកស្រី ប៉ឹង កល្យាណ និងលោក ឡា សាំងថង បានសម្រុះសម្រួលដោយជោគជ័យលើវិវាទកិច្ចសន្យាខ្ចីប្រាក់ពាក់ព័ន្ធនឹងប្រជាពលរដ្ឋក្នុងមូលដ្ឋានខេត្តកណ្តាល។

វិវាទនេះកើតចេញពីការខកខានរបស់ភាគីម្ខាងក្នុងការបំពេញកាតព្វកិច្ចដែលមានចែងក្នុងកិច្ចសន្យាខ្ចីប្រាក់។ បើទោះជាមានការព្យាយាមដោះស្រាយកន្លងមកក៏ដោយ ក៏ភាគីទាំងពីរមិនអាចឈានដល់ការព្រមព្រៀងគ្នាបានឡើយ។ នៅខែតុលា ឆ្នាំ ២០២៤ ភាគីមួយបានងាកទៅរក អ.ដ.ក. សម្រាប់ជំនួយការសម្របសម្រួល។

បន្ទាប់ពីពិនិត្យ និងពិចារណាយ៉ាងម៉ត់ចត់លើករណីនេះ មន្ត្រី អ.ដ.ក. បានសម្របសម្រួលដោះស្រាយដោយផ្អែកទៅឆន្ទៈយល់ព្រមពីភាគីទាំងពីរ។

លទ្ធផលនៃការសម្រុះសម្រួលគឺជាកិច្ចព្រមព្រៀងជាលាយលក្ខណ៍អក្សរផ្សះផ្សា ដែលមានទម្ងន់ផ្លូវច្បាប់ដូចគ្នាទៅនឹងសាលក្រមស្ថាពររបស់តុលាការ ដែលនាំឱ្យវិវាទឈានដល់ទីបញ្ចប់។ ករណីនេះគូសបញ្ជាក់អំពីប្រសិទ្ធភាពនៃយន្តការដោះស្រាយវិវាទក្រៅតុលាការក្នុងការផ្តល់ដំណោះស្រាយទាន់ពេលវេលា និងប្រកបដោយមិត្តភាពសម្រាប់ប្រជាពលរដ្ឋ៕